NISHNAABE KINOOMAADWIN NAADMAADWIN
NISHNAABE EZHI-DEBWE'ENDANG
"DA-GKENDAANAAWAA GO WAA-ZHICHIGEWAAD BEMAADZIJIGGIISHPIN BGIDNIGAAZWAAD WII-NAADMAADZIWAAD" (Openheimer)
Naanaagdawendmowin gda'aanaa Gzhemnidoo gaa-miingoying
waa-zhi-bmaadziying wii-wiijiwangwaa gwiiji-bmaadziimnaanig.
Ka-naadmaadmi wii-mshkawziiying
weweni wii-naaknigeying waa-ni-zhiwebak.
Aabdig kwii-noojmomi gaa-bi-zhi-nigaagoying.
Bemaadzijig go wiinwaa da-gkendaanaawaa waa-zhi-naadmaadziwaad.
Mii maanda "Nishnaabe Kinoomaadwin Naadmaadwin" enji-teg
wii-kinoomaading waa-zhi-naadmaading.
Ka-mjimnaanaa go maanda naanaagdawendmowin
Nishnaabe ezhi-debwe'endang.
Aabdig go maanda da-zhiwebad wii-mno-bmaadziying
Gzhemnidoo gegiinwi gaa-zhi-miingoying zhitwaawin naasaab go
gwiiji-bmaadziimnaanig gewiinwaa gaa-zhi-miingaazwaad 'dazhtwaawniwaa.
Gaawiin ndawendaagsinoo wiya ji-ngaasdood enaaknigeying
ezhi-debwe'endmang. Nishnaabe-naaknigewnan go gda'aanaanin.
Mii maanda enji-teg "Nishnaabe Kinoomaadwin Naadmaadwin".
Ka-noojmomi kina enchiying.
Gii-noojmoying ka-naadmawaanaanig kina bemaadzijig
yaakozijig, eshkendmojig ji-ni-mno-yaawaad.
Mii sa ezhi-kinoomaagooying kina wii-mno-gnawaamdiying,
wii-naadmaadying, wii-mno-maamwi-nokiiying.
Weweni wii-mno-bmaadziying miinwaa shkagkmig-kwe wii-mno-bmaadzid.
"Kesheyanakwan" (Fast Moving Cloud)
Elder Dr. Art Solomon, L.L.B., D.D.